من أحق بمعرفتك أكثر من نفسك؟

 ايه هو ال MBTI؟؟

ال MBTI هو اختصار ل Myers-Briggs Types Indicator و ده معناه مؤشر"مايرز بريغرز" للأنماط، و هو حاجة زي استبيان كدة الشخص بيملاه بناءً علي وجهة نظره و طريقة تفكيره فالحاجات اللي حواليه و بيطلعله نتايج بناءً علي اختياراته دي.

الأنماط اللي بتطلع من النتايج دي هما 16 نمط مش بيتغيروا و انت لازم بتطلع واحد من ال 16 نمط دول،والتايب(النمط) بتاعك مش بيتغير،مش بيتغير، مش بيتغير!

  في دراسات عن النظرية دي بتقول ان التايب بتاعك بيفضل معاك من يوم ولادتك (حاجة زي ال DNA كدة يعني)..

عارفة أول سؤال جه ف دماغكم..طب ازاي بعد كل الحاجات اللي بمر بيها فحياتي و شخصيتي هتفضل زي ما هي؟ اكيد انا دلوقتي مش هو أنا من خمس سنين؟ 

 هقولك صح فعلًا بس انت شخصيتك متغيرتش..انت بس نضجت، و ف ال MBTI تحديدًا ده اسمه تطوير ال functions بتاع ال type بتاعك (بس ده موضوع تاني كبير فسيبونا منه دلوقتي)

المهم ان التايب بتاعك مبيتغيرش فمحدش يفكر ف الحوار ده خالص او يخليه يدخل دماغه عشان احنا ناس كبيرة و عيب كدة ♥

في ناس تانية بتفكر ان ازاي انا ممكن احصر نفسي ف نوع واحد من 16 نوع..عاوزة تفهميني ان شخصيات الناس اللي ف الدنيا كووللهااا 16 شخصية بس؟ مستحيل طبعا!، هقولك ان الموضوع مش بالسهولة دي خالص في من التايب الواحد كذا نوع يعني ممكن يكون في اتنين نفس التايب واحد منهم healthy و التاني unhealthy و دول لو حطيتهم جنب بعض عمرك ما هتقتنع انهم نفس التايب أساسًا من كتر ما هما مختلفين.. لكن هما؟ هما نفس التايب D":   

ده غير ان في حاجة تانية اسمها الانيجرام و ده اعمق بكتير من ال mbti، علي فكرة يعني ممكن تبقوا انتو الاتنين نفس التايب و الانيجرام بتاعكم مختلف و ده بيخليكم شخصين مختلفين تمامًا برضو (بس ده برضو حواركبير هنبقي نتكلم فيه بعدين)

اللي عاوزة اوصلهلكم يعني ان النظرية دى كبيرة و عميقة و مش سطحية زي مانتو فاكرين..و ف الأول و الآخر هي مجرد نظرية، صدقوها او كذبوها It's up to you💁

المهم..

كل تايب من ال 16 تايب بيبقي مكون من 4 خانات، كل خانة فيها حرف بدلالة معينة زي INFP ، ENTJ و كل خانة من الخانات دي بتبقي ليها اختيار من اختيارين ملهمش تالت زي:

اول خانة: 

 ي اما I ي اما E   

ال I يعني Introverted يعني انطوائي و ده الشخص اللي بيكون حيوي و مبسوط اكتر و هو بيقضي وقت مع نفسه ،غالبًا مبيبدأش هو كلام و بيسمع اكتر ما بيتكلم، كتوم، صداقاته محدودة لكن عميقة، بيتضايق لو حد كلمه و هو مثلا بيمع اغاني او بيتفرج على حاجة ف التليفزيون، لما بييجي يتكلم مع حد غريب بيكون كلامه قليل و متحفظ، بيحب يشتغل و يذاكر لوحده مش ف جروب 

و ال E يعني Extroverted يعني اجتماعي و ده شخص بيكون مبسوط اكتر وهو وسط الناس، مبيحبش يقعد لوحده، مش كتوم خالص بيحكي قصة حياته لأي حد معدي ف الشارع، بيحب التجمعات و بيحب يحضر حفلات، بيحب الجروبات بتاع المذاكرة و الشغل، لو سيبته خمس دقايق فمكان و رجعت هتلاقي المكان كله بقي اصحابه، غالبًا هو الشخص اللي لما تمشي معاه ف الشارع بييوقفك كل دقيقتين عشان يسلم علي حد 

تاني خانة: 

 ي اما N ي اما S  

ال N يعني intuition يعني حدس و ال S يعني sensing يعني احساس (ايوة في فرق بينهم)   

 ال N مثلا بيبص جوا الحاجة، المعني اللي وراها، مؤمن بالإلهام، بيحب الخيال،بيحب يستنتج، عشوائي و مبدع ، بيتكلم فتلتوميت موضوع فنفس الوقت وبيربط بينهم بطريقة ما 😂😂، عايش ف المستقبل و علطول سرحان و مش هنا  

اما ال S فبيبص للحاجة نفسها، شخص منطقي بيعتمد علي اللي هو شايفه قدامه ،مبيحبش الاستنتاجات و لا النظريات و بيحب اكتر يتعامل مع الحقايق و الارقام،لو اتسأل عن حاجة بيجاوب اجابة دقيقة عشان هو بيحب يتسأل اسئلة دقيقة، بيركزف الحاضروف اللي هو بيعمله دلوقتي

تالت خانة: 

 ي اما F ي اما T  

ال F يعني feeler يعني عاطفي شخص بيفكر بمشاعره و بيسيبها تأثر علي قراراته و غالبا بيتعامل مع المشاكل بشكل شخصي، شخص دبلوماسي ، بيقبل الاشخاص اللي حواليه بناءً علي حاجة جواه و احساسه ن الشخص ده كويس و لا لا و لما بييجي ياخد قرار بيراعي الناس اللي حواليه و ممكن يتأثروا بقراره ده، مهتم ب رأي الناس اللي حواليه بيه  

ال T يعني thinker يعني عقلاني و ده شخص منطقي،موضوعي ، بيستخدم عقله ف اتخاذ القرارات، مبياخدش الأمور بصورة شخصية زي الfeeler ،غالبًا الناس بتشوفه شخص عديم المشاعر بس ده مش صح هم بيقدروا المشاعر جدًا بس لوكانت منطقية😂اللي هو اه ماشي تمام ده موقف يزعل حقك تتضايقي ، مش دبلوماسي زي الfeeler هو بيميل للنقد اكتر

رابع خانة:

 ي اما P ي اما J   

ال p يعني perceiving و ده الشخص المرن اللي دايمًا بيزنق نفسه زنقة الكلاب و شايف ان لا لسه بدري، مبيحبش ياخد القرار ف ساعتها بيحب يأجله لآخر لحظة، مرن و بيعرف يتكيف مع أي حاجة بتحصل فحياته بسرعة، لو حط خطة للعمل بيغيرها كل ما يحصل علي معلومات جديدة   

ال j بقي ده الشخص اللي بيحب يخلص كل اللي وراه بعدين يقعد كدة يستريح ،بيحب ياخد قراراته علطول و يحسم أموره و مبيحبش الدنيا تبقي عايمة كدة ، بيحب يخطط لكل حاجة و مبيديش فرصة للمفاجآت ، بيحترم النظام، بييجي فمواعيده ، بيخلص كل اللي وراه قبل الديدلاين ، بيبقي صعب عليه يتأقلم مع حدث جديد فحياته (زي موت حد قريب منه، فركشة...الخ)  

طيب انا ازاي اعرف التايب بتاعي؟

في كذا اختبار ممكن تعملهم عشان تعرف اشهرهم هو الاختبار ده  مع اني مش برجحه اوي انه سطحي و نسبة مصداقيته مش اوي بس هو كويس كبداية يعني..المهم تعمل الاختبار ده و تشوف الوصف بتاع الشخصية تحت النتيجة و هل هو بينطبق عليك و لا لا؟ و لازم كمان تبقي عارف ان محدش بيشوف اجاباتك ف لازم تبقي صبور و تجاوب بالراحة و بصدق عشان النتايج تطلعلك صح.. مش تجاوب اي كلام بعدين يطلعلك نتيجة غلط تقوم تضرب بالنظرية كلها عرض الحائط و نينيني ايه ده النظرية دي هبل مفيش فرق بينها و بين الابراج كخ غلط كدة

  💖 so.. that's all for today