سلالة الآلهة الإغريقية (1): Chaos وذريتها

ناس كتير عارفة زيوس وهادس وافروديت والآلهة دى..بس هل عمرك فكرت الآلهة دى جت ازاي؟

أنا هقولك، بص يا سيدى..

في فترة مكانش ع الأرض شمس و لا ضوء و لا سما و لا أي حياة أساسًا و مكانش في غير حاجة واحدة بس هي اللي موجودة اللي هي Chaos أو الفوضى، "Chaos" كانت lifeless matter (شيء بلا حياة)  وهي بتجسد المكان غير المحدد او الفراغ العشوائي  للكون و في الأساطير الإغريقية هى الحاجة الأولية اللي جه منها كل حاجة بعد كدة زي فجوة كدة او ثقب أسود، وهى خليط كبير جامد و قوي جدًا من الكتلة و الطاقة.

فى أقوال تانية بتقول ان Chaos هى المكان الواقع بين الأرض بتاع البشر و"تارتاروس" اللى هو العالم السفلى-ده غير عالم الاموات-وفى أقوال تانية بتقول ان ده كان المكان اللى بيتم نفى التايتنز ليه.

 السائد والمتعارف عليه وأكتر حاجة موثقة فى الأساطير الإغريقية هى أن Chaos هى اللى اتجسد منها كل حاجة.

أول حاجة اتجسدت منها كان أطفالها التلاتة اللى اسمهم الـ primordial gods أو "الآلهة البدائية" وهم:

• Gaya: وهى بتمثل الأرض وتعتبر الأم لكل ما هو جميل على وجه الحياة
• Tartarus: وهو يمثل العالم السفلى وزى ما قولت ده غير عالم الأموات، وكان بيستخدم كأبشع مكان للسجن وهو قوى جدًا بحيث انه ممكن يحتوى الآلهة كمان
• Eros: اللى هو كيبوبيد وهو بيمثل الحب، وكان يعتبر أجمل الآلهة وكان رفيق دائم لـ "أفروديت". عادةً بيرمز ليه بطفل صغير يحمل قوس وسهم.

من الحاجات اللذيذة انه الإله الوحيد اللى فشكل طفل لأن الطفل هو رمز حب شخصين، وفى أقوال تانية بتقول انه فى شكل طفل لأن الحب ساعات بيجمع أشخاص مش متشابهين إطلاقًا لأن إيروس طفل و بيضرب السهم بتاعه فأى حد لأنه بيحب يلعب😂

بعد ما Chaos خلفت أبنائها التلاتة دول حست انها لسه مش راضية عن نفسها فخلفت كمان اتنين اللى هم:

•  Erebus: اللى هو بيمثل الظلام 
• Nyx: اللى هى بتمثل الليل

"نيكس" و "ايريبوس" اتجوزوا-أيوة عادى عندهم الاخوات بيتجوزوا بعض- وخلفوا اتنين اللى هم:

• Aether: وهو الأثير أو الهواء الإلهي
• Hemera: اللى هى النهار

وبرغم انها كانت ذرية مضيئة إلا انها كانت ذرية مشهورة بالشر والأذى لدرجة ان زيوس نفسه كان بيخاف منهم ومن غضبهم.

التكملة فالأجزاء الجاية💕