مجموعات نجوم الدب الأصغر والدب الأكبر:(كاليستو وزيوس)
تعرفوا تسمية مجموعات النجوم بتاع الدب الأكبر والدب الأصغر جت منين؟
كان في حورية جميلة اسمها "كاليستو"، كانت بنت ملك اركيديا و كانت من مرافقين "أرتميس"اللي هى الهة الصيد والقمر، وبما انها من أتباع "أرتميس" فهى أخدت عهد بالعفة وده معناه انها مش هتتجوز أبدًا و هتفضل عذراء للأبد.
فـالمهم ان "زيوس" شافها وعجبته وحول شكله لـ "أرتميس" عشان يعرف يستغلها وبالفعل خلفت "كاليستو" ولد اسمه "أركاس"، بعد كدة اتحولت لدب وقد اختلفت الأقاويل فالحتة دهين فـيا إما "هيرا"-مرات زيوس-حست بالغيرة و قامت محولاها، يا إما "زيوس" كان بيحاول يداري المصيبة اللى هببها فحولها لدب، يا إما أرتميس سخطت عليها عشان كسرت عهد العفة وحولتها.
المهم بقي بعد ما "كاليستو" اتحولت قعدت تمشي فالغابات و هي مش عارفة تختلط بالدببة لأنها فالأصل انسان وخايفة منهم و فنفس الوقت خايفة من الصيادين عشان هي فهيئة دب، و فيوم و "أركاس" طالع يصطاد شافته أمه "كاليستو" فمشاعر الأمومة غلبتها و كانت راحة تحضنه ف طبعاً الولد خاف (يعنى شايف دب جاي يجري عليه طبيعي يترعب) و طلع الرمح بتاعه عشان يقتل الدب، وهنا "زيوس" قرر يتدخل و قام رافعهم هما الاتنين من الأرض و حطهم بين النجوم فالسما فبقي عندنا مجموعة نجوم الدب الأصغر و الدب الأكبر.
تعليقات
إرسال تعليق