قارة أوروبا: (زيوس وأوروبا)
تعرفوا ليه قارة أوروبا اتسمت بالاسم ده؟
كان فى بنت جميلة عذراء اسمها "أوروبا"، في يوم من الأيام حلمت بقارتين اتشكلوا على هيئة ستات و كانوا بيتخانقوا عليها، القارة الأولى اللي هى "آسيا" بتقول ان بما إن "اوروبا" اتولدت فـ "آسيا" فهى فبالتأكيد تنتمى ليها، بينما القارة التانية-اللى مكانش ليها اسم- قالت ان مكان ولادتها مش مهم وان "زيوس" كدة كدة هيديها "اوروبا".
"اوروبا" صحيت من النوم متضايقة ومعرفتش ترجع تنام تانى، فقامت جمعت صحابها (اللى كانوا كلهم نبلاء وفنفس سنها تقريبًا) وقررت تاخدهم و يروحوا يجمعوا الزهور على البحر، طبعًا "زيوس شاف مجموعة البنات الحلوة دول واللى لفتت نظره بالذات كانت "اوروبا" وده لأنها كانت أجمل العذارى.
ظهر "زيوس" للمجموعة دى فى شكل ثور ابيض وكان شكله احلى من أى ثور تانى، ريحته كانت زهور و كان لطيف و مسالم اوى لدرجة ان مجموعة البنات كلهم راحوا يلعبوا معاه و يحضنوه.. قام الثور رايح موطى راسه تحت "اوروبا" ومطلعها فوق ضهره وقام جاري بيها بسرعة ناحية البحر.
مرة واحدة لقت "اوروبا" حوريات بحر راكبين دلافين بيعوموا حواليها وجنبها، وإله البحر"تريتون" بينفخ فالبوق بتاعه وكمان لقت "بوسايدون" هناك فأدركت بسرعة ان اكيد لازم يكون الثور ده إله و قعدت تستعطفه انه يشفق عليها ويرحمها، ف "زيوس" فهمها انه بيحبها و مش عاوز يأذيها، وأخدها لجزيرة "كريت" ووعدها انه هيخليها تخلفله ولاد كتير مشهورين-وده اكيد شرف لأى بنى آدمة يعنى😂- وبالفعل اتسمت قارة اوروبا على اسمها وخلفتله "مينوس" و"رادمانثوس".
"هيرا" مكانتش تعرف حاجة عن العلاقة دى فبالتالي محاولتش تأذيها أو تلعنها أو تعملها حاجة.
تعليقات
إرسال تعليق